Ֆրանչիսկոս Սրբազան Քահանայապետին 7 Յունիսի թուիթը` ''Աղօթքով ամէն բան կարելի է''

Շաբաթ, 7 Յունիս 2014-ին հրատարակած թուիթին մէջ, Ֆրանչիսկոս Սրբազան Քահանայապետը դարձեալ շեշտը դրաւ աղօթքի կարեւորութեան վրայ որով ''ամէն բան կարելի է'', գրեց Ան ու հրաւիրեց ''աղօթքը օգտագործել Միջին Արեւելքի ու համայն աշխարհի մէջ խաղաղութիւն հաստատելու համար''։
''Աղօթքը կարող է ամէն բան կատարել։ Օգտագործենք զայն Միջին Արեւելքին ու համայն աշխարհին տանելու խաղաղութիւն'', գրեց Ֆրանչիսկոս Քահանայապետը, #weprayforpeace ''աշդակը'' աւելցնելով։
Յայտնենք որ Ուրբաթ, 6 Յունիս 2014-ին հրատարակած թուիթին մէջ եւս, Նորին Սրբութիւնը ակնարկած էր թէ ''Խաղաղութիւնը Աստուծոյ պարգեւ մըն է որ մեր յանձնառումին կը կարօտի'' եւ հրաւիրած էր ''Ջանալ ըլլալ խաղաղութեան մարդիկ, գործով եւ աղօթքով''։
Նշենք թէ վաղը`Կիրակի 8 Յունիսին, Ֆրանչիսկոս Քահանայապետի հրաւէրով, Վատիկանի պարտեզներուն մէջ տեղի կ՛ունենայ, Միջին Արեւելքի խաղաղութեան աղօթքի ձեռնարկը, որուն կը մասնակցին, Իսրայէլի նախագահ` Շիմոն Փերեսը, Պաղեստինի Նախագահ` Մահմուտ Ապպասը եւ Կ. Պոլսոյ Տիեզերական Պատրիարք` Բարթողոմէոս Ա-ը։